Arda Guler po vazhdon të shkëlqejë në fanellën e Real Madridit. Pas fitores së ngushtë ndaj Juventusit në “Santiago Bernabéu”, talenti turk u shpall lojtari më i mirë i ndeshjes (MVP) në kuadër të javës së tretë të Champions League.
Në një ndeshje ku “Los Blancos” treguan forcë dhe qetësi përballë një rivali të fortë, Guler spikati me lojën e tij krijuese në mesfushë, duke udhëhequr ritmin dhe duke qenë një nga faktorët kryesorë të suksesit të skuadrës së Xabi Alonso-s.
Pas ndeshjes, 20-vjeçari u shpreh i lumtur për momentin që po përjeton dhe falënderues ndaj trajnerit:
“Ndihem pjesë e rëndësishme e ekipit falë Xabi Alonsos, i cili ka treguar besim të madh tek unë. Mundohem të jap maksimumin në çdo ndeshje. Ai më kërkon të kontrolloj ritmin e lojës dhe të jem krijues – sot mendoj se e arrita këtë.”
I pyetur nëse preferon të luajë si numër 10 apo numër 8, Guler u përgjigj me qetësi:
“Nuk ka rëndësi për mua. Nëse trajneri dëshiron që të shënoj dhe të asistoj më shumë, mund të luaj si 10-sh, por ndihem po aq mirë edhe si 8-sh. Gjëja më e rëndësishme është të ndihmoj skuadrën.”
Turku, që po përjeton sezonin e tij më të mirë me Realin, gjithashtu foli për marrëdhënien e shkëlqyer me Kylian Mbappé, me të cilin ka krijuar një partneritet frytdhënës në fushë:
“Marrëdhënia me Mbappén është fantastike – si në fushë, ashtu edhe jashtë saj. Ai është një njeri i jashtëzakonshëm, dhe kjo ndihmon shumë në mënyrën si luajmë bashkë.”
Me këtë fitore, Real Madrid mban vendin e pestë në renditjen e përgjithshme të Champions League, si një nga vetëm pesë ekipet që kanë fituar të tre ndeshjet e para, së bashku me Arsenal, PSG, Bayern Munich dhe Inter.
