Profesori amerikan dhe ekspert për Ballkanin, Daniel Serwer, ka theksuar disa probleme që lidhen me Gjykatën Speciale dhe akuzat ndaj ish-udhëheqësve të Ushtrisë Çlirimtare të Kosovës (UÇK). Ai ka kaluar 40 minuta në Hagë me ish-presidentin Hashim Thaçi dhe në një shkrim të tij e ka kritikuar procesin gjyqësor, duke thënë se është një “mashtrim”.
Serwer ka theksuar katër pika kryesore që tregojnë se çfarë nuk po shkon me këtë gjykatë. E para, ai ka shprehur habinë që ish-udhëheqësit e UÇK-së akuzohen për “ndërmarrje të përbashkët kriminale” në vend që të gjykohen për akuza më serioze si trafikimi i organeve. Kjo, sipas tij, krijon përshtypjen se po kriminalizohet vetë revolta kundër shtypjes serbe, e cila është pika e dytë e tij.
Pika e tretë që ai përmendi është mospërfshirja e Serbisë në jurisdiksionin e gjykatës, duke përmendur rastin e vrasjes së tre vëllezërve Bytyqi. Ai insinuon se, nëse diplomatët do t’ia kishin kushtuar më shumë rëndësi kësaj çështjeje, mund të kishte pasur një gjykatë më të drejtë.
Pika e fundit, më e rëndësishmja sipas tij, është koha e gjatë që liderët e UÇK-së kanë kaluar në paraburgim. Ai shpërqeëndron parimin e pafajësisë derisa të provohet fajësia, duke vënë në dyshim që ndalimi i tyre për pesë vjet para se të zbuloheshin provat është i drejtë. Serwer e përfundon duke reflektuar mbi marrëdhëniet e tij me Thaçin gjatë viteve dhe vendimet që u morën gjatë luftës së Kosovës.
Gjyqi ndaj Thaçit, Kadri Veselit, Jakup Krasniqit dhe Rexhep Selimit nisi më 2023, pas arrestimit të tyre tri vjet më parë. Gjyqi, që përfshin akuza serioze për krime lufte dhe krime kundër njerëzimit, pritet të përfundojë deri në muajin dhjetor. Të gjithë të akuzuarit e mohojnë fajësinë, ndërsa avokatët mbrojtës kanë argumentuar se UÇK-ja kishte marrë mbështetje ndërkombëtare dhe nuk kishte pasur plan kriminal siç pretendohet.
