Florjan Binaj, kandidati i pavarur për Bashkinë e Tiranës, ka bërë një apel përmes një video-mesazhi qytetarëve të kryeqytetit, ku shpreh falënderimet e tij për mbështetjen e marrë deri tani.
Ai thekson se ka pranuar shumë mesazhe emocionuese dhe frymëzuese nga qytetarët, duke e përshkruar mbështetjen si “elektrizuese”.
Në mesazhin e tij, Binaj falenderon të gjithë ata që e kanë përkrahur qysh nga dita e parë e fushatës dhe shprehet se ka lexuar çdo mesazh, pavarësisht se nuk ka mundur t’u kthejë përgjigje të gjithëve.
Ai po ashtu thekson se problemet që shqetësojnë qytetarët, si cilësia e ajrit, trafik, problemet me ujin dhe vendet e parkimit, janë gjithashtu shqetësime të tijat. “I jetoj vetë çdo ditë, ashtu si ju,” deklaron ai.
Binaj e sheh këtë fushatë si një lëvizje për ndryshim dhe përmirësim cilësor në administrimin e Tiranës. Ai thekson se kjo është një nismë që po ndërtohet së bashku me qytetarët, për të mirën e përbashkët dhe jo për interesa private.
Ndryshimi që ai kërkon, sipas tij, ka si qëllim ndershmërinë dhe shpëtimin e Tiranës nga problemet e shumta me të cilat përballet.
Në përfundim të mesazhit, ai i inkurajon qytetarët të vazhdojnë ta kontaktojnë atë përmes numrit të telefonit ose adresës së emailit të dhënë, duke u falenderuar sërish për përkrahjen e vazhdueshme.
Binaj përmbyll mesazhin duke shprehur besimin se bashkë do të arrihet një ndryshim i rëndësishëm për kryeqytetin shqiptar.
