Endrit Thaçi, djali i ish-kryeministrit të Kosovës Hashim Thaçi i është bashkuar protestës në sheshin “Skënderbej” ku janë grumbulluar me mijëra qytetarë nga të gjitha trevat në mbështetje të ish-krerëve të Ushtrisë Çlirimtare të Kosovës, të cilët ndodhen në paraburgim në Hagë.
Djali i Hashim Thaçit ndodhet në rreshtin e parë të protestuesve në krah të kreut të grupit parlamentar socialist Taulant Balla.
Prej disa minutash ka nisur protesta në sheshin “Skënderbej”; ku mijëra qytetarë kanë mbushur vendin ndërsa mbizotërojnë silmbolet kombëtare dhe ato të UÇK.
Në orët e para të ditës së sotme, në “Rrugën e Kombit”, e cila u bë pa pagesë në shenjë solidariteti me pjesëmarrësit e protestës, u vërejtën lëvizje të shtuara. Dhjetëra automjete nga Kosova, të zbukuruara me flamuj kuqezi dhe simbole të UÇK-së udhëtuan në grupe drejt kryeqytetit shqiptar.
Kjo protestë është e treta me radhë pas atyre të mbajtura në Prishtinë dhe Hagë, ku më 14 shtator u mblodhën rreth 10 mijë shqiptarë në afërsi të Gjykatës Speciale. Në Hagë, që prej 3 prillit 2023, po zhvillohet procesi ndaj ish-krerëve të UÇK-së: Hashim Thaçi, Kadri Veseli, Jakup Krasniqi dhe Rexhep Selimi, të cilët i kanë mohuar të gjitha akuzat për krime lufte dhe krime kundër njerëzimit.
