Në nisje të fjalës së tij në tubimin qytetar, kryetari i Partisë Demokratike, Sali Berisha, u ndal te vrasja tragjike e 14-vjeçarit, Martin Cani në derën e shkollës ‘Fan Noli’, duke bërë thirrje që qytetarët t’i bashkohen protestës.
‘Vrasjen e Martinit duan ta mbulojnë me Tik Tokun, të gjithë shqiptarët t’i bashkohen protestës së thirrur për të’, tha Berisha.
Kryedemokrati në fjalën e tij, i ka bërë thirrje rinisë që të ngrihet në këmbë dhe t’i bashkohet protestë së nesërme të opozitës, duke theksuar se do jetë dita e revoltës.
‘Nesër është dita e revoltës, mbarë rinia shqiptare është në Tiranë me moton; o sot, o kurrë, është radha jonë’, tha Berisha.
Gjatë fjalës së mbajtur, lideri i opozitës, u ndal edhe te pensionet, të cilat tha se janë më të ulëta se sa pagesa që marrin gjermanët për një qen në shtëpi.
‘Edi Rama u jep pension të moshuarve, më pak se sa paga që Gjermania vendosi për qenin e shtëpisë’, theksoi Berisha.
Berisha tha se Edi Rama e ka tejkaluar edhe diktatorin Enver Hoxh.
‘Edi Rama e ke tejkaluar edhe Enver Hoxhën, por shqiptarët nesër do të të japin reston ty për luksin që ke vënë’, u shpreh Berisha gjatë fjalës së tij.
Kryetari i Partisë Demokratike, Sali Berisha bëri edhe njëherë thirrje për marshimin e nesërm të opozitës ditën e martë 26 nëntor në Tiranë.
‘Nesër Shqipëria marshim në Tiranë. Nuk durohet një narkodiktator si ky, i cili mbjell dhunë kudo që shkon’, ishte thirrja e kreut të PD-së, Sali Berisha në fjalën e tij gjatë tubimit qytetar.
