Gianluca Soncin hyri me forcë në shtëpinë e ish-partneres së tij, Pamela Genini, në Milano, mbrëmjen e së martës duke përdorur çelësat që i kishte bërë kopje fshehurazi disa javë më parë. 52-vjeçari më pas e vrau atë.
Pikërisht në atë moment, ajo po fliste në telefon me ish-të dashurin e saj, të cilit i kishte besuar frikën, sulmet dhe kërcënimet me vdekje të biznesmenit. Pamela Genini e mbylli papritur telefonatën.
Mesazhi i fundit i dëshpëruar
“Kam frikë, ai i ka bërë një kopje të çelësave të mi. Hyri me forcë. Telefono policinë”. Ky ishte mesazhi i fundit i dëshpëruar që ajo i dërgoi ish-partnerit të saj, i cili më pas njoftoi policinë.
Telefonata e ndërprerë
Pak para se të mbërrinte në apartamentin në Via Iglesias 33, Pamela dhe ish i dashuri i saj po flisnin në telefon. Ajo po i rrëfente atij se nuk pendohej që e kishte lënë Gianluca Soncin. Megjithatë, telefonata u ndërpre papritur.
Pastaj, disa minuta më vonë, 29-vjeçarja i dërgoi mesazhin, në përgjigje të përpjekjeve të shumta të ish-të dashurit të saj për të rikontaktuar me të dhe për të kuptuar se çfarë po ndodhte.
Ishte ish-i dashuri i saj që ngriti alarmin duke telefonuar policinë, pasi mori thirrjen e parë për ndihmë të 29-vjeçares.
Marrja në pyetje
Gianluca Soncin i tha hetuesve se nuk e mbante mend. 52-vjeçari, i shtruar në spital pasi pësoi një dëmtim të lehtë në qafë para se të arrestohej, dukej i ftohtë dhe i distancuar dhe nuk iu përgjigj pyetjeve të prokurores Alessia Menegazzo.
Ai mori ndihmën mjekësore dhe më pas u dërgua në burgun San Vittore, ku do të merret në pyetje.
52-vjeçari nga Biella kishte pasur probleme me ligjin në vitin 2010 sepse ishte i përfshirë në një komplot me “kompani fiktive” për të shmangur TVSH-në për një seri makinash luksoze të importuara nga Gjermania.
Vrasja
Hetuesit kanë ngritur akuzë ndaj tij për vrasje me paramendim. Ai dyshohet se ka shkuar me makinë në lagjen në periferi të Milanos me qëllim vrasjen e Pamelës.
Kjo vërtetohet nga fakti se ai kishte marrë me vete një thikë të madhe gjuetie, e përdorur për të masakruar 29-vjeçaren, e cila u godit 24 herë. Ai gjithashtu përdori një kopje të çelësave që i kishte bërë fshehurazi disa javë më parë për të hyrë brenda në banesë.
Dëshmitarët kanë folur edhe për raste dhune në të kaluarën (dhe për këtë arsye, Soncin do të akuzohet gjithashtu për përndjekje). Modelja e sipërmarrësja s’kishte bërë denoncim në polici, por në rreth një vit të marrëdhënies së tyre ishte shoqëruar me incidente abuzimi dhe përndjekjeje.
“Nëse më lë, do të të vras”
E para filloi në fillim të lidhjes së tyre, kur ajo u zhvendos në shtëpinë e tij në Cervia. 52-vjeçari dyshohet se nuk e lejonte të takohej me miqtë e saj që në fillim, duke u përpjekur gjithashtu ta izolonte duke e kontrolluar financiarisht.
Marsin e kaluar, ata u zhvendosën në apartamentin në Via Iglesias. Kjo për pak kohë, sepse ajo e la atë menjëherë pas kësaj.
Soncin (i cili nuk duket se jeton më në Gorla) më pas u bë gjithnjë e më këmbëngulës dhe i dhunshëm.
“Nëse më lë, do të të vras”, dyshohet se i tha ai disa herë, aq shumë sa e shtyu Pamelën të merrte në konsideratë kthimin në shtëpinë e prindërve të saj në zonën e Bergamos.
Ky plan përfundimisht dështoi për shkak të kërcënimeve që 52-vjeçari dyshohet se i bëri edhe prindërve të saj.
