Anëtarë të Komisionit Qendror Zgjedhor (KQZ) kanë kërkuar nga organet e rendit që të nisin hetime në disa komuna për dyshimet për manipulim të votave në zgjedhjet e 12 tetorit. Ata kanë përmendur parregullsi si ndërrimi i vendvotimeve, që sipas tyre, mund të kenë ndikuar në rezultatet zgjedhore.
Ilir Gashi, një nga anëtarët e KQZ-së nga Partia Demokratike (PDK), shprehu shqetësim për veprime të paligjshme në fshatin Belinc të Komunës së Shtimes. Ai kërkoi që organet kompetente të hetojnë rastin, duke theksuar se ka indikacione të qarta për shkelje të rënda, përfshirë përdorimin e metodave të njohura për manipulim zgjdhës, siç është ‘Treni bullgar’, si dhe probleme të fletëvotimeve. Gashi theksoi se një hetim i tillë është i domosdoshëm për të mbrojtur integritetin e procesit demokratik.
Muharrem Nitaj, një tjetër anëtar i KQZ-së nga Aleanca për Ardhmërinë e Kosovës (AAK), po ashtu ngriti shqetësime lidhur me qindra raste të ndërrimit të vendvotimeve. Ai e përmendi komunën e Junikut si rast më eklatant, ku kanditati për kryetar, Agron Kuqi, në ankesën e tij përmendi rritjen e pazakontë të numrit të votuesve që nuk kanë lidhje me këtë komunë. Sipas tij, kjo situatë duhet të trajtohet si një problem serioz për të parandaluar përsëritjen e saj në të ardhmen.
Edhe deputeti i AAK-së, Daut Haradinaj, kërkoi hetime për ndërrimin e vendvotimeve në Junik, duke argumentuar se ka shumë qytetarë nga qytete të tjera që janë regjistruar si votues në këtë komunë në mënyrë të organizuar. Ai kërkoi publikimin e listës zgjedhore për të zbuluar skemat e manipulimit.
Një ditë më parë, Prokuroria Themelore në Mitrovicën e Jugut njoftoi se kishte nisur grumbullimin e informatave lidhur me dyshimet për keqpërdorim të votave në fshatin Shipol. Këto zhvillime e theksojnë nevojën për një hetim të plotë për të siguruar besueshmërinë e sistemit zgjedhor në Kosovë.
