Kreu i SPAK, Altin Dumani, ka folur sot në Komisionin e Ligjeve për hetimet mbi skandalin e mikro-kredive, pas pyetjes së deputetit të Partisë Mundësia, Erald Kapri, i cili kërkoi të dinte nëse është thirrur Guvernatori i Bankës së Shqipërisë për këtë çështje.
Kapri përmendi rastin e rëndë të vetëvrasjes së një qytetareje para godinës së SPAK, duke kërkuar përgjigje mbi ecurinë e hetimeve dhe përgjegjësinë e institucioneve mbikëqyrëse.
Në reagimin e tij, Dumani sqaroi se hetimet për rastin e mikro-kredive kanë përfunduar dhe dosja ndodhet tashmë në Gjykatën e Posaçme të Shkallës së Parë për Korrupsion dhe Krimin e Organizuar.
“Çështja e mikro-kredive hetimet për krijuesit kanë përfunduar dhe është dërguar për gjykim. Janë dërguar për gjykim 16 shtetas dhe 4 persona juridik, ndërsa janë sekuestruar 420 milionë lekë dhe 1.3 milionë euro, si dhe pasuri të luajtshme e të paluajtshme. Po verifikohet pozita e secilit person të përfshirë,” deklaroi kreu i SPAK.
Dumani nuk konfirmoi nëse Guvernatori i Bankës së Shqipërisë është thirrur nga prokuroria, por theksoi se verifikimet po vijojnë për të gjithë personat që mund të kenë pasur rol në këtë skemë abuzive që ka prekur rreth 100 mijë qytetarë.
