Inter ka vendosur ta mbajë me çdo kusht Pio Espositon, talentin 20-vjeçar që po mahnit Italinë. Sipas “Gazzetta dello Sport”, zikaltërit kanë refuzuar një ofertë prej 50 milionë eurosh për sulmuesin e ri dhe janë duke përgatitur një kontratë të re, me rritje të ndjeshme page – nga 1 milion në mbi 2 milionë euro në sezon.
I rritur në akademinë e klubit, Esposito ka shpërthyer këtë sezon me gola të rëndësishëm si në Serie A ashtu edhe me kombëtaren e Gattusos, ku shënoi kundër Estonisë. Me trup prej gjigandi, karakter të fortë dhe përkushtim në çdo metër fushe, ai shihet si një pasuri e paprekshme për të ardhmen e Interit.
Trajneri Cristian Chivu e ka ngritur në hierarki si zëvendës i parë i Lautaro Martínez dhe Marcus Thuram, ndërsa drejtuesit Marotta dhe Ausilio e cilësojnë “të pashitshëm”. Për Interin, Pio Esposito është simboli i brezit të ri zikaltër dhe një investim që pritet t’i japë lavdi klubit në vitet e ardhshme.
