Nga e shtuna, më 12 tetor, do të zbatohet gradualisht sistemi i ri të kontrollit të hyrjeve dhe daljeve në Bashkimin Evropian për shtetasit e vendeve të treta që gëzojnë lëvizje pa viza, përfshirë edhe kosovarët. Ky sistem, i njohur si Entry-Exit System (EES), synon të ndihmojë në rritjen e sigurisë për vendet e BE-së pa e kufizuar liberalizimin e vizave.
Sipas rregullave të reja, në pikëkalimet kufitare do të merren gjurmët e katër gishta dhe një fotografi digjitale të udhëtarëve, proces që do të regjistrohet në EES. Ky regjistrim do të bëhet vetëm gjatë hyrjes së parë në BE; herët e tjera do të nevojitet vetëm krahasimi i fotografisë në pasaportë me atë në sistem. Markus Lamert, zëdhënësi i Komisionit Evropian, ka sqaruar se për gjashtë muajt e parë sistemi do të përdoret në mënyrë të kufizuar, dhe do të hyjë plotësisht në fuqi më 10 prill 2026.
Masat e reja pritet të sjellin pritje më të gjata në kufij, për shkak të procedurave të reja, megjithatë zyrtarët e BE-së nuk presin që këto ndryshime të shkaktojnë ndikime dramatike në qarkullimin e udhëtarëve. BE-ja beson se me këto masa do të ketë një kontroll më të mirë mbi ata që hyjnë në territorin e saj, duke lehtësuar identifikimin dhe sanksionimin e individëve që nuk përmbushin rregullat e liberalizimit të vizave, sidomos ato që lidhen me qëndrimin e kufizuar.
Sipas rregullave të liberalizimit të vizave, qëndrimi në territorin e BE-së është i kufizuar deri në 90 ditë brenda 180 ditëve. Shkelësit e këtyre rregullave do të përballen me pasoja, mes të cilave ndalimi i hyrjes në territorin e BE-së. Ky sistem ka si qëllim përmirësimin e sigurisë dhe menaxhimin e fluksit të udhëtarëve që hyjnë në Evropë, duke siguruar që vetëm ata që përmbushin kritere të caktuara të lejohen të qendrojnë për periudha të caktuara.
