Një ngjarje e pazakontë ka ndodhur në ambientet e Gjykatës së Shkallës së Parë të Juridiksionit të Përgjithshëm në Vlorë, ku një avokat është arrestuar pasi ka ushtruar dhunë fizike ndaj një punonjësi sigurie gjatë ushtrimit të detyrës.
Ngjarja ka ndodhur rreth orës 12:30, kur gjatë një konflikti verbal brenda gjykatës, Redi Llanaj, 42 vjeç, banues në Vlorë, ka goditur me grusht në fytyrë punonjësin e sigurisë F. M., 60 vjeç, duke i shkaktuar dëmtime.
Pas incidentit, avokati është ndaluar nga forcat e sigurisë dhe më pas është arrestuar për goditje për shkak të detyrës, një vepër që parashikohet dhe dënohet nga Kodi Penal.
Ngjarja ka shkaktuar reagime në radhët e punonjësve të sistemit të drejtësisë, ndërsa pritet që Dhoma e Avokatisë së Vlorës të mbajë një qëndrim publik për rastin.
