Komandanti i Gardës së Republikës, Simon Zereci ka mbërritur mëngjesin e kësaj të premte pranë ambienteve të Gjykatës së Posaçme kundër Korrupsionit dhe Krimit të Organizuar.
Me kërkesë të kryetarit të Gjykatës, Erion Banit, Zereci ka zbarkuar paraditen e sotme për inspektim, për të parë nga afër dhe për të diskutuar lidhur me kushtet e sigurisë.
Burime për mediat bëjnë me dije se Zereci së bashku me Banin kanë zhvilluar një takim ku dhe kanë biseduar sa i përket kushteve në të cilat gjyqtarët ushtrojnë aktivitetin e tyre.
Një ditë më parë, gjatë mbledhjes së jashtëzakonshme të 260 gjyqtarëve të Shqipërisë, Bani foli mbi gjendjen e sigurisë dhe kërkoi inspektime në të gjitha ambientet e gjykatave.
Ai deklaroi se duhen evidentuar të gjitha problematikat deri tek pyetja e gjyqtarëve dhe stafit të gjykatave për çdo shqetësim apo problematikë që mund të hasin gjatë ushtrimit të funksioneve.
Pas ngjarjes tragjike të 6 tetorit, ku gjyqtari Astrit Kalaja u ekzekutua me armë zjarri brenda ambienteve të Gjykatës së Apelit në Tiranë, pak pas dhënies së vendimit, gjyqtarët e Republikës së Shqipërisë dolën me një deklaratë të fortë, duke e cilësuar këtë akt si një plagë të rëndë për sistemin e drejtësisë.
Gjatë mbledhjes së jashtëzakonshme, e cila u zhvillua ditën e djeshme, gjyqtarët shprehën dhimbjen e thellë për humbjen e kolegut të tyre, duke nënvizuar se ngjarja përbën një kufi të papranueshëm të cenimit të sigurisë dhe dinjitetit të drejtësisë shqiptare.
Si rrjedhojë ata listuan një sërë kërkesash konkrete dhe të menjëhershme për të garantuar sigurinë dhe funksionimin e drejtësisë në vend. Gjithashtu, kërkuan që kolegu i tyre Astrit Kalaja të shpallet “Dëshmor i Atdheut”.
