Pabarazia ekonomike vazhdon të jetë një nga sfidat më të mëdha në mbarë botën, duke përfshirë edhe kontinentin europian. Sipas të dhënave të “Our World in Data”, në pothuajse të gjitha shtetet e Europës, 1% më i pasur i popullsisë zotëron të paktën 20% të pasurisë kombëtare.
Sipas revistës prestigjioze Forbes, në vitin 2025 numri i miliarderëve në botë ka arritur mbi 3,000, me një pasuri totale të përbashkët prej 16.1 trilionë dollarësh. Megjithatë, ajo është e përqendruar kryesisht në vetëm tre shtete. Shtetet e Bashkuara të Amerikës, Kina dhe India zotërojnë më shumë se gjysmën e miliarderëve të botës.
Ndërsa në nivel global dominimi është jashtë Evropës, kontinenti i vjetër ka gjithashtu një numër të konsiderueshëm të pasurish. Sipas Forbes, shteti evropian me numrin më të madh të miliarderëve është Gjermania, me gjithsej 171 individë që kanë pasuri mbi një miliard dollarë. Pasuria e kombinuar e tyre arrin në 676.4 miliardë euro.
Në vendin e dytë gjejmë Italinë, me 74 miliarderë që së bashku zotërojnë 289 miliardë euro. Mbretëria e Bashkuar renditet në vendin e tretë, me 55 miliarderë që kanë një pasuri të kombinuar prej 203 miliardë eurosh.
Në Francë numërohen 52 miliarderë, ndërsa menjëherë pas saj renditen Suedia me 45 dhe Zvicra me 42 miliarderë, duke reflektuar nivelin e lartë të pasurisë së përqendruar në këto shtete relativisht të vogla.
Midis pesë ekonomive më të mëdha të Evropës, Spanja ka numrin më të ulët të super të pasurve, me 34 në total.
