Partitë politike kanë ndezur “motorët” për zgjedhjet e pjesshme që do të mbahen më 9 nëntor në gjashtë bashki të vendit. Në qendër të vëmendjes është Tirana, ku opozita po përgatitet për një fushatë intensive në mbështetje të kandidatit të pavarur Florjan Binaj.
Burime nga selia blu bëjnë me dije se deputetët e Partisë Demokratike, në zonat ku nuk zhvillohen zgjedhje, do të angazhohen tërësisht në kryeqytet. Çdo njësi e Tiranës pritet të mbulohet nga grupe pune të deputetëve demokratë, të cilët do të koordinojnë takimet me qytetarët dhe aktivitetet elektorale.
Kreu i PD-së ka kërkuar maksimizimin e përpjekjeve për fitoren e Binajt, duke theksuar se rezultati në Tiranë do të ketë rëndësi të madhe politike për opozitën.
Fushata pritet të nisë zyrtarisht në ditët në vijim, ndërsa partitë po përgatiten për një garë të fortë në disa prej bashkive më të rëndësishme të vendit.
