Sipas një raporti të fundit të Organizatës Botërore të Shëndetësisë (OBSH), mbi 100 milionë njerëz në mbarë botën përdorin cigare elektronike — një fenomen që po hap një epokë të re të varësisë nga nikotina.
Ndërsa pirja tradicionale e duhanit ka rënë ndjeshëm në vitet e fundit, OBSH paralajmëron se përdorimi i cigareve elektronike dhe produkteve të tjera të ngjashme po çon në një rritje të konsumit të nikotinës, sidomos tek të rinjtë.
Raporti thekson se përdorimi i cigareve elektronike është rritur ndjeshëm në mesin e adoleshentëve dhe të rinjve, të cilët shpesh i konsiderojnë ato si një alternativë më të sigurt ndaj duhanit klasik.
Megjithatë, ekspertët paralajmërojnë se efektet afatgjata të këtyre produkteve për shëndetin mbeten ende të paqarta. Studimet tregojnë gjithashtu se shumë të rinj që nisin me cigare elektronike, më vonë kalojnë drejt përdorimit të duhanit tradicional.
Sipas OBSH-së, kjo situatë përkeqësohet nga marketingu agresiv i kompanive prodhuese, të cilat e promovojnë përdorimin e cigareve elektronike si një trend modern dhe tërheqës, duke synuar kryesisht grupmoshat e reja.
Organizata bën thirrje për masa të rrepta rregullatore për të frenuar përdorimin e këtyre produkteve, përfshirë ndalimin e përdorimit të tyre në hapësira publike, kufizimin e reklamimit dhe forcimin e programeve të edukimit shëndetësor.
