Policia e Shtetit në bashkëpunim me partnerët ndërkombëtar ka goditur një grup kriminal që që trafikonte femra nga vendet e Amerikës Latine dhe të Azisë Qendrore, me qëllim shfrytëzimin e tyre për prostitucion, në Shqipëri.
Në kuadër të operacionit “Rrjeti”, në Shqipëri janë ekzekutuar 7 masa sigurie “arrest me burg”.
Në pranga janë vënë shtetasit Assel Adrysheva, 43 vjeçe, Rostyslav Mieshkov, 53 vjeç, Denis Berisha, 39 vjeç, Mirel Shperdheja, 28 vjeç, Dritan Suka, 37 vjeç, Ilmar Gugashi, 35 vjeç dhe Kejvin Ndreu, 25 vjeç.
Gjithashtu u ekzekutua masa e sigurisë “Detyrim për t’u paraqitur pranë policisë gjyqësore”, për shtetasit Z. B., 25 vjeç dhe K. C., 29 vjeç.
Në Kolumbi u arrestua organizatori i veprimtarisë kriminale, shtetasi kolumbian Lukas Betancur.
Policia gjtë operacionit ka zbuluar një hotel në rrugën “Reshit Collaku”, ku akomodoheshin dhe shfrytëzoheshin për prostitucion, disa nga shtetaset e huaja.
Si funksiononte grupi kriminal
Të gjithë anëtarët e grupit kishin detyra të caktuara.
Sipas policisë Lukas Betancur kishte rolin kryesor në rekrutimin e vajzave nga vendet e Amerikës Latine dhe në organizimin e udhëtimit dhe akomodimit të tyre në Shqipëri, ku më pas ato detyroheshin të ushtronin prostitucion.
Në rast refuzimi, kolumbiani ushtronte presion dhe kërcënime ndaj vajzave dhe familjarëve të tyre në Kolumbi. Ky shtetas bashkëpunonte me shtetasin Dritan Suka, për sigurimin e kushteve për akomodimin e vajzave dhe menaxhimin e rrjetit të prostitucionit.
Shtetasi Ilmar Gugashi kishte përshtatur një hotel në rrugën “Reshit Collaku”, në Tiranë, si vend për akomodomin e vajzave dhe shfrytëzimin e tyre për prostitucion.
Assel Adrysheva dhe Kejvin Ndreu shfrytëzonin për prostitucion, disa shtetase nga Kazakistani, të cilat i strehonin në këtë hotel.
Denis Berisha iu jepte lëndë narkotike disa vajzave dhe siguronte klientë për prostitucion.
Shtetasi K. P. (i arrestuar më parë), mblidhte të ardhurat e përfituara nga aktiviteti kriminal dhe i transferonte ato nëpërmjet kriptovalutave, në llogaritë e organizatorit.
Policia ka sekuestruar shuma parash, 7 celularë dhe prova të tjera të vlefshme për hetimin.
