Napoli arriti fitoren e parë në këtë edicion të Champions League, duke mundur Sportingun me rezultatin 2-1. Heroi i italianëve ishte sulmuesi danez Rasmus Højlund, i cili shënoi dy gola dhe çoi në tre numrin e realizimeve të tij në kompeticion.
Një nga golat e tij erdhi pas një asisti nga Kevin De Bruyne, i cili pas ndeshjes foli për shokun e skuadrës dhe e krahasoi me Erling Haaland.
“Mendoj se Rasmus është duke u rritur shumë dhe është shumë i ngjashëm me Haaland. Të dy e duan të sulmojnë thellësinë. Ndoshta Højlund vjen më shpesh të marrë topin, por ai duhet të vazhdojë të shfrytëzojë hapësirat, sepse mund të shënojë shumë dhe të na ndihmojë jashtëzakonisht,” tha De Bruyne për Corriere dello Sport.
Mesfushori belg shtoi se Napoli e meritoi fitoren, pavarësisht gabimit që solli penalltinë për Sportingun:
“Bëmë një lojë të madhe, edhe pse edhe ata patën cilësi e intensitet. Penalltia ishte një gabim i panevojshëm, por ne krijuam raste dhe e merituam fitoren.”
Nën drejtimin e Antonio Contes, Højlund po gjen më shumë shërbim në repartin ofensiv të Napolit sesa kishte te Manchester United, dhe kjo po i ndihmon të tregojë potencialin e tij të plotë. Danezi ka lënë të kuptohet se dëshiron të qëndrojë në Napoli edhe pas kësaj sezone.
