Presidenti i Ukrainës Volodymyr Zelenskyy, ka deklaruar se nuk do të kërkojë një mandat të ri nëse lufta me Rusinë përfundon.
“Nëse arrijmë ta mbyllim këtë luftë, atëherë po, jam i gatshëm të mos kandidoj sërish. Zgjedhjet nuk janë qëllimi im,” u shpreh ai në një intervistë për portalin amerikan Axios.
Zelensky theksoi se motivi i tij kryesor ishte të qëndronte pranë popullit ukrainas në një periudhë tejet të vështirë. “Qëllimi im është ta ndal luftën,” shtoi ai, duke bërë të ditur se sapo të arrihet një armëpushim, do t’i kërkojë parlamentit të organizojë zgjedhje të reja.
Zgjedhjet presidenciale të planifikuara për vitin 2024 u shtynë për shkak të ligjit ushtarak, i cili është në fuqi që prej pushtimit rus në shkurt 2022.
Presidenti ukrainas ka ruajtur një nivel të lartë mbështetjeje publike gjatë më shumë se tre viteve e gjysmë të luftës. Një sondazh i fundit nga Instituti Ndërkombëtar i Sociologjisë në Kiev tregoi se rreth 59% e qytetarëve ende i besojnë Zelensky-t, ndërsa 34% shprehën mosbesim.
