Deputetja e Partisë Demokratike, Jorida Tabaku, ka reaguar pas largimit të Erion Veliajt nga drejtimi i Bashkisë së Tiranës, duke e cilësuar këtë si “fundin përfundimtar të një jete politike të ndërtuar mbi propagandë dhe gënjeshtër”.
Në deklaratën e saj, Tabaku e krahasoi largimin e Veliajt me pabesinë e shembjes së Teatrit Kombëtar më 17 maj, duke kujtuar se vendimi për shembjen u mor në orët e para të mëngjesit, ndërsa protestuesit ndodheshin ende brenda godinës.
Tabaku theksoi se vendimi për shkarkimin e Veliajt ngjason me procedurat e përshpejtuara të inceneratorit të Tiranës, një projekt që ajo e cilëson si “aferë të pastër korruptive” me një kosto prej mbi 300 milionë euro për taksapaguesit.
Ajo akuzoi Veliajn për arrogancë dhe megallomani, duke thënë se ai përdori pushtetin për të sulmuar kundërshtarët politikë me akuza të shpikura, të cilat më pas dolën në dosjen e tij hetimore.
Deputetja demokratike kritikoi ashpër anëtarët socialistë të Këshillit Bashkiak, të cilët dikur e mbështesnin Veliajn, por sot e kanë braktisur. Ajo i quajti hipokritë, duke kujtuar premtimet për një Tiranë të gjelbër që u kthyen në një “ferr betoni”.
Në fund të deklaratës, Tabaku paralajmëroi se rrëzimi i Veliajt nuk do të jetë i vetmi, duke thënë se “Shoqëria e Hajdutëve” po sakrifikon një nga figurat e saj për të shpëtuar të tjerët, por fundi i tyre do të jetë i njëjtë.
Ajo e përmbylli me një mesazh politik: “Pushteti nuk është i përjetshëm, vjen dita kur duhet të japësh llogari. Siç mëson dhe Shekspiri: ‘S’ka natë që s’ka të gdhirë, sado qoftë e gjatë.’”
