Takimin e parë zyrtar dhe publik, ministri i ri i Drejtësisë, Besfort Lamallari e ka patur me kreun e Prokurorisë së Posaçme, Altin Dumanin.
Lajmi e ka bërë me dije vetë ministri Lamallari, i cili thotë se ndau me kreun e SPAK prioritetet e ministrisë së Drejtësisë si pjesë e Programit Qeverisës 2025-2029, në përputhje të plotë dhe me detyrimet e ndërmarra në kuadër të negociatave me Bashkimin Evropian.
Pas postimit të Lamallarit ka ardhur një reagim nga kreu i grupit parlamentar të PD-së, Gazment Bardhi, i cili thotë se marrëdhëniet e SPAK me ekzekutivin duhet të udhëhiqen vetëm nga ligji dhe jo të përdoren për propagandë. Sipas tij, nuk ka asnjë bazë ligjore që drejtuesi i SPAK të diskutojë prioritetet e qeverisë apo programin qeverisës.
Bardhi thekson se SPAK nuk mund të jetë mekanizëm propagande i Qeverisë, por institucioni kyç që lufton korrupsionin qeveritar dhe krimin e organizuar. Sipas tij, SPAK nuk është institucion nën varësinë e ekzekutivit dhe nuk duhet të sillet në publik si i tillë.
“Marrëdhënia e Drejtuesit të Prokurorisë së Posaçme SPAK me segmente të Ekzekutivit, përfshirë Ministrin e Drejtësisë, duhet të udhëhiqet vetëm nga ligji. Marrëdhënie të tilla institucionale nuk duhet të ndodhin për nevoja propagande të Ekzekutivit, sepse SPAK nuk mund të jetë mekanizëm propagande i Qeverisë, por institucioni kyç që lufton korrupsionin qeveritar dhe krimin e organizuar.
Askund, por askund nuk parashikohet se me drejtuesin e SPAK ndahen prioritetet e Qeverisë dhe aq më pak që ky i fundit dëgjon prioritetet e programit të Qeverisë. Ç’lidhje ka SPAK me prioritetet e Qeverisë së korruptuar të Edi Ramës, kur në fakt prioritet i saj duhet të jetë lufta ndaj korrupsionit qeveritar?
SPAK nuk është institucion nën varësinë e ekzekutivit dhe nuk duhet të sillet në publik si i tillë, sepse pavarësia e sistemit gjyqësor duhet edhe të duket që ekziston. Kjo pozë në zyrën e Ministrit të Drejtësisë dhe njoftimi i Ministrit të Drejtësisë që ka ndarë prioritetet e programit qeverisës, është një akt propagande i pandodhur kurrë më parë.” – shkruan Bardhi.
