Ata bëjnë një kompromis me veten për të qëndruar ulur për orë të tëra para kompjuterit, me kufje në vesh, pa marrë parasysh ndikimet negative që kjo sjell për shëndetin e tyre. Kompanitë e call-centerave janë të fokusuar vetëm në numrin e thirrjeve dhe shitjet, duke anashkaluar mirëqenien e punonjësve të tyre.
Një studim ka zbuluar se në 60% të call-centerave, shumica e të rinjve kanë raportuar probleme të ndryshme shëndetësore, si dhe shqetësime të lidhura me shtyllën kurrizore, dëgjimin, shikimin dhe shëndetin mendor. Stresi dhe presioni nga thirrjet e gjata telefonike janë një nga shkaqet kryesore të këtyre problemeve. Sipas Ilir Xhemalajt, përfaqësues i Sindikatës Kombëtare të operatorëve telefonikë, “95% e punonjësve raportuan probleme si spoliartrozë, lodhje e syve dhe dëmtim të dëgjimit.”
Disa call-centera operojnë në ambiente me qira dhe nuk respektojnë asnjë standard të kërkuar, si hapësira, drita ose kushte të tjera të domosdoshme për punonjësit. Një operator, i cili ka 16 vjet përvojë, thotë: “Kam një kompjuter të vitit 2010 dhe kufje që përdoren nga tre punonjës, sepse ndërrojmë turnet.”
Të rinjtë shpesh detyrohen të punojnë më shumë se orari i kontratës prej 6 orësh, pasi kjo është e vetmja mundësi për të siguruar një pagë që mbulon shpenzimet e jetesës. “6 orë është orari i kontratës, por nuk paguhesh asgjë për këtë. Duhet të punosh dyfish për të marrë një pagë të denjë,” thotë një tjetër punonjës.
Mjeku, i cili është një detyrim ligjor, figuron vetëm në letër, pasi nuk ka kontrolle fizike për punonjësit në këto ambiente.
