Kryeministri grek, Kyriakos Mitsotakis, ka marrë vendimin për të përjashtuar ish-kryeministrin konservator, Antonis Samaras, nga radhët e partisë Demokracia e Re. Ky veprim erdhi pas një interviste kontroverse të Samaras në gazetën “TO BHMA,” ku ai kritikoi ashpër qeverisjen aktuale dhe politikën e jashtme të drejtuar nga Mitsotakis dhe ministri i Jashtëm, Georgios Gerapetritis.
Në deklaratën e tij, Samaras akuzoi kryeministrin Mitsotakis dhe presidentin qipriot Nikos Christodoulidis për “flirt” politik me presidentin turk, Recep Tayyip Erdoğan dhe kryeministrin shqiptar, Edi Rama një gjuhë që shkaktoi reagime të ashpra nga partia.
Partia Demokracia e Re publikoi një deklaratë zyrtare duke theksuar se ndërhyrjet e Samaras nuk ishin thjesht mendime politike, por sulme të pavenda që përçanin gënjeshtra dhe dëmtonin qëllimisht stabilitetin politik të vendit. Në deklaratë u theksua se këto veprime janë të papranueshme dhe të papajtueshme me drejtimin strategjik të partisë, e cila ka arritur fitore të rëndësishme nën udhëheqjen e Mitsotakis.
Në intervistën e tij, Samaras propozoi gjithashtu emrin e Kostandinos Karamanlis për postin e Presidentit të Republikës, një tjetër veprim që u cilësua si provokues nga drejtuesit e Demokracisë së Re. Ai gjithashtu kërkoi dorëheqjen e ministrit të Jashtëm, duke e akuzuar atë për një qasje të butë ndaj provokimeve turke.
Me këtë vendim, Kryeministri Mitsotakis ka deklaruar se shumica qeveritare do të vazhdojë punën e saj pa përfshirjen e Samaras, duke theksuar rëndësinë e stabilitetit kombëtar në kohë të vështira.
