Kompania Meta ka prezantuar një gamë të re syzesh inteligjente gjatë konferencës vjetore Meta Connect, të drejtuar nga Mark Zuckerberg. Të zhvilluara në bashkëpunim me dy marka të njohura syzesh, modelet e reja integrojnë inteligjencën artificiale, duke synuar të ofrojnë një eksperiencë të avancuar në komunikim dhe argëtim.
Modeli kryesor, Meta Ray-Ban Display, vjen me një ekran me ngjyra të plota dhe rezolucion të lartë, një kamerë 12 MP, si dhe mundësinë për të kryer video-thirrje dhe për të parë mesazhe. Përveç këtij modeli, u prezantuan edhe Oakley Meta Vanguard (499 dollarë) dhe gjenerata e dytë e Ray-Ban Meta (379 dollarë). Çmimi i syzeve Meta Ray-Ban Display është vendosur në 799 dollarë.
Gjatë prezantimit, Zuckerberg e cilësoi teknologjinë si një “zbulim të madh shkencor”, ndonëse eventin e shoqëruan edhe disa pengesa teknike, përfshirë një thirrje WhatsApp që nuk funksionoi siç ishte planifikuar. Ai megjithatë mbetet i bindur se syzet do të shndërrohen në një platformë të rëndësishme për integrimin e inteligjencës artificiale në jetën e përditshme.
Analistët shprehen optimistë për suksesin e kësaj linje të re, duke theksuar se syzet ofrojnë një formë më të thjeshtë dhe praktike të teknologjisë, krahasuar me projektin e diskutueshëm të Metaverse. Sipas Mike Proulx nga Forrester, sfida kryesore do të mbetet bindja e publikut se përfitimet e këtyre syzeve justifikojnë kostot e tyre.
Që nga viti 2023, Meta ka shitur mbi 2 milionë palë syze inteligjente, ndërsa kompania po përgatitet të rrisë investimet në ndërtimin e qendrave të të dhënave të inteligjencës artificiale në SHBA.
