Ambasadorja e SHBA në Shqipëri, Nancy VanHorn, mori pjesë në një pritje për nder të Ditës së Kushtetutës së Shteteve të Bashkuara, duke theksuar rëndësinë e kësaj date dhe parimet themelore mbi të cilat ndërtohen kushtetutat. Në këtë ngjarje, e cila mblodhi përfaqësues të lartë të sistemit të drejtësisë dhe politikës shqiptare, si kreu i SPAK, Altin Dumani, dhe ministri Niko Peleshi, VanHorn foli për fuqinë dhe qëndrueshmërinë e Kushtetutës amerikane.
Ajo theksoi se kushtetutat janë të ndërtuara mbi principe të rëndësishme për një demokraci funksionale, duke përfshirë mbrojtjen e të drejtave individuale, ndarjen e pushteteve, lirinë e fjalës dhe sundimin e ligjit. Këto parime, sipas saj, nuk janë thjesht ideale abstrakte, por përbëjnë themelin e besimit midis qeverive dhe qytetarëve, duke garantuar që drejtësia të zbatohet në mënyrë të barabartë dhe që çdo individ të respektohet.
VanHorn nënvizoi rolin e rëndësishëm të gjyqtarëve, prokurorëve, shoqërisë civile dhe medias në mbrojtjen e të drejtave të qytetarëve shqiptarë. Ajo i inkurajoi ata që të angazhohen për një sistem të drejtësisë më të fortë dhe transparent, duke kërkuar guxim për të marrë vendime të vështira dhe për të përballuar korrupsionin.
“Gjatë kësaj pune ju keni përgjegjësinë për të forcuar besimin midis institucioneve dhe popullit,” tha VanHorn. Ajo shprehu shpresën që të gjithë të gjenin guximin për të mbështetur idealet që e bëjnë të mundur demokracinë.
Dita e Kushtetutës shërben si një moment reflektimi mbi guximin e atyre që kanë kontribuar në mbrojtjen e këtyre parimeve, dhe VanHorn përfundoi duke falenderuar të pranishmit për përkushtimin e tyre ndaj këtyre idealeve. Kjo ngjarje përshkroi edhe një herë rëndësinë e bashkëpunimit në forcimin e vlerave demokratike në Shqipëri.
