Qeveria shqiptare nuk ka mundur dot të prezantojë programin e saj qeverisës, pasi opozita ka bllokuar punimet e Kuvendit, duke detyruar grupin socialist të kalonte menjëherë në votim. Me 82 vota PRO, programi 4 vjeçar i qeverisë së re socialiste është miratuar sot.
Gjithçka ka nisur kur kryeministri Edi Rama mori fjalën në foltore dhe vendosi t’ia japë ministres virtuale Diella, duke ngjallur neveri te anëtarët e opozitës. Disa braktisën sallën, të tjerët përplasën tavolinat dhe Kuvendi shkoi në 5 minuta pushim.
Mirëpo, rikthimi nuk ishte sërish i qetë dhe socialistët, ashtu siç paralajmëroi Edi Rama, kaluan menjëherë në votimin e programit qeverisës.
Kaosi u përhap në gjithë sallën pasi deputetët e opozitës u çuan nga vendet e tyre dhe u drejtuan për te foltorja dhe kabineti qeveritar. Ata nisnin të hidhnin librin e Kushtetutës mbi kokat kryeministrit dhe ministrave, si të ishte një send i pavlerë.
Kushtetuta është ligji më i lartë në Republikën e Shqipërisë dhe njihet si ligji themeltar i shtetit.
