Një 20-vjeçar është arrestuar në Tiranë pasi u kap në flagrancë duke marrë në një degë postare një pako me 593 gramë Cannabis Sativa me përqindje të lartë THC, të dyshuar të trafikuar nga Spanja.
I riu, me iniciale E. P., banues në Kamzë, u ndalua në momentin e marrjes së pakos. Gjatë hetimeve u identifikua edhe porositësi, shtetasi B. C., 38 vjeç, i cili është shpallur në kërkim.
“Në vijim të operacioneve për goditjen e rasteve të trafikimit të lëndës narkotike Cannabis Sativa me përqindje të lartë THC, Seksioni për Hetimin e Narkotikëve, në drejtimin e Prokurorisë, si dhe në bashkëpunim me Komisariatin e Policisë Rinas dhe me Filialin Qendra Tranzite e Postës Shqiptare, finalizoi operacionin “Adresa”.
Gjatë operacionit, u vu në pranga shtetasi E. P., 20 vjeç, banues në Kamzë, i cili u kap në flagrancë, në një degë postare në kryeqytet, gjatë marrjes së një pakoje me 593 gramë Cannabis me përqindje të lartë THC, të dyshuar të trafikuar nga Spanja.
Si rezultat i hetimeve të kryera në kuadër të këtij operacioni u mundësua dhe identifikimi i porositësit të pakos, shtetasit B. C., 38 vjeç, për kapjen e të cilit, Policia vijon intensivisht punën.”, njofton policia
