Presidenti i Barcelonës, Joan Laporta, po sheh transferimin e yllit norvegjez, Erling Haaland, si një prioritet kryesor për të ardhmen, duke e konsideruar atë si trashëgimtarin e Robert Lewandowskit. Sipas raportimeve nga mediat spanjolle, edhe pse klubi përballet me sfida financiare të mëdha, Laporta është i vendosur të përgatitë një lëvizje ambicioze për verën e ardhshme.
Lewandowski, aktualisht 37 vjeç, pritet të largohet në fund të këtij sezoni pasi i skadon kontrata. Edhe pse ai ka vazhduar të shënojë gola, siç tregon edhe dopieta e fundit ndaj Valencias, trajneri Hansi Flick po menaxhon me kujdes minutazhin e tij pas një dëmtimi të mëparshëm. Ferran Torres ka kontribuar me disa gola, por ka dyshime nëse ai mund ta mbajë barrën si titullar për gjatë gjithë sezonit.
Për këtë arsye, drejtuesit e klubit, përfshirë Laporta dhe drejtorin sportiv Deco, po kërkojnë një “numër 9” të ri, me Haalandin si objektivi kryesor. Megjithatë, transferimi i tij paraqet sfida të mëdha; ai ka nënshkruar një kontratë 10-vjeçare me Manchester City, që e lidh atë deri në vitin 2034, pa klauzolë lirimi. Me një pagë prej 400 mijë £ në javë dhe një bilanc prej 111 golash në 126 ndeshje, Haaland ka qenë jetik për sukseset e City-t, duke fituar dy tituj të Premier League dhe një Champions League.
Barcelona kishte tentuar për transferimin e tij në vitin 2022, por tani Laporta beson se çdo rënie në performancën e City mund ta bëjë Haalandin të mendojë për një largim, me një objektiv që shkon përtej vitit 2026.
Përveç vështirësive financiare, klubi po përballet edhe me vonesa në rindërtimin e stadiumit “Camp Nou”, i cili ka një kosto prej 1.25 miliardë £. Të gjitha këto sfida kanë sjellë pakënaqësi të mëdha mes tifozëve, të cilët aktualisht po ndjekin ndeshjet në stadiumin e vogël “Estadi Johan Cruyff”.
