Festivali Ndërkombëtar i Filmit për të Drejtat e Njeriut është ndalur në shkollën e Magjistraturës ku ka shfaqur një film mbi atë që ndodhi në SHBA pas vdekjes së George Floyd. Drejtori i ‘Magjistraturës’ Arben Rakipi, kërkoi të bëjë dallimin mes populizmit dhe opinioni publik ndërsa vuri në dukje ndikimin që ka reagimi i publikut në ngjarje si kjo.
Festivali Ndërkombëtar i Filmit për të Drejtat e Njeriut është ndalur në shkollën e Magjistraturës ku ka shfaqur filmin dokumentarin “Trupi politik”. Ai ndjek një vit punë të kryetarit të bashkisë në Baltimorë në SHBA në mes të kryengritjeve për rastin e George Floyd që vdiq në duart e policisë. Rasti në fjalë është trajtuar në leksione për studentët edhe nga Drejtori i ‘Magjistraturës’ Arben Rakipi, I cili në shfaqjen e filmit vuri në dukje ndryshimin mes opinionit publik dhe populizmit.
“E kam parë për aq sa lidhet me ndikimin e opinionit publik në çështjet e drejtësisë. Në një pikë të bisedës sonë jam ndalur te e keqja që vjen nga populizmi dhe ndikimi që populizmi ka në ndërgjegjen e gjyqtarëve. Mbi këtë pikëvështrim kam trajtuar raportin mes populizmit dhe opinionit publik. Ka një ndryshim të madh mes këtyre koncepteve dhe konkluzioni është që opinioni publik në shumë raste është i domosdoshëm për të shtyre përpara punën e gjyqtarit”, tha Rakipi.
Filmi merr në shqyrtim kostot që paguhen për shkak të përkushtimit ndaj parimeve. Rakipi në fjalën e tij tha se filma si ky nuk janë art por ndërgjegjësim dhe një lloj angazhimi në sistemin e drejtësisë.
“Janë jo thjesht për argëtim por synojnë përçimi nga brenda qendrës sonë të disa mesazheve që vetëm filmi është ia aftë të japë, në këtë rast, mesazhin e drejtësisë, mesazhin e ndikimit që ka drejtësia apo drejtësia e pjesshme dhe lidhjen e drejtpërdrejtë të drejtësisë apo padrejtësisë me reagimin publik”, tha Rakipi.
Drejtori i festivalit, Kujtim Çashku vuri në dukje rëndësinë e dallimit të koncepteve e po ashtu, ndikimin që kanë festival si ky për demokracinë. I organizuar nga Akademia e Filmit dhe Multimedias Marubi, festivali ka sjellë 40 filma që janë shfaqur për target grupe të ndryshme, nën temën “vepro gjelbër tani dhe për të ardhmen”.
