Grupi Parlamentar i Partisë Demokratike ka dërguar një letër drejtuar nëntë ambasadave në Tiranë, përfshirë SHBA dhe Bashkimin Evropian, ku shpreh shqetësimin mbi ndryshimet e propozuara nga kryeministri Edi Rama në Rregulloren e Kuvendit.
Kryetari i grupit, Gazment Bardhi, paralajmëron se këto ndryshime dëmtojnë procesin e integrimit evropian të Shqipërisë dhe përjashtojnë opozitën nga vendimmarrja.
Sipas Bardhit, gjatë Asamblesë Kombëtare të Partisë Socialiste më 11 shtator, mazhoranca propozoi ndryshime që rrisin numrin e komisioneve parlamentare nga 8 në 11 dhe bashkojnë Komisionin për Integrimin Evropian me Komisionin për Punët e Jashtme, duke ia dhënë drejtimin vetëm përfaqësuesve të mazhorancës.
Ai thekson se kjo shkel traditën e gjatë parlamentare dhe praktikat demokratike në rajon, ku komisioni i integrimit udhëhiqet nga opozita për të garantuar shqyrtimin e duhur të ligjeve që lidhen me integrimin evropian.
