Më 13 shtator, partitë politike të certifikuara për zgjedhjet lokale të 12 tetorit në Kosovë nisin zyrtarisht fushatën e tyre. Gabashkë me fushatën, kandidatët për kryetarë të komunave dhe për kuvendet lokale do të prezantojnë programet e tyre, me qëllim që të bindin qytetarët që t’i votojnë.
Rrjeti i organizatave për mbikëqyrjen e procesit zgjedhor, Demokracia në Veprim (DnV), u bëri thirrje subjekteve politike dhe kandidatëve të zhvillojnë një garë zgjedhore “në frymë të përgjegjshme, fer dhe kompetitive.” Në këtë kontekst, DnV theksoi rëndësinë e respektimit të Kodit të Mirësjelljes për Subjektet Politike, duke kërkuar që institucionet përgjegjëse të sigurojnë një zbatim të barabartë të ligjeve.
Për zgjedhjet e 12 tetorit, 2,069,098 votues kanë të drejtë vote për zgjedhjen e kryetarëve në 38 komuna, përfshirë 43,993 votues nga jashtë Kosovës. Votuesit e diasporës do të kenë mundësinë të votojnë me postë duke filluar nga 17 shtatori. Komisioni Qendror i Zgjedhjeve (KQZ) ka njoftuar se zgjedhjet do të organizohen në 938 qendra votimi me gjithsej 2,625 vendvotime.
Numri total i kandidatëve në këtë zgjedhje arrin në 5,626, ku 206 janë kandidatë për kryetarë komunash, ndërsa pjesa tjetër për ulëse në kuvende komunale. KQZ ka certifikuar gjithsej 93 subjekte politike, përfshirë 32 parti, 32 iniciativa qytetare, dy koalicione dhe 27 kandidatë të pavarur.
Zgjedhjet e fundit lokale në Kosovë janë mbajtur në tetor të vitit 2021, ku Partia Demokratike e Kosovës kishte fituar më së shumti komuna, ndjekur nga Lidhja Demokratike e Kosovës. Kjo fushatë zgjedhore përbën një mundësi të rëndësishme për kandidatët dhe partitë që të prezantojnë planet e tyre dhe të rivalizojnë në një atmosferë demokratike.
