Presidenti i Republikës, Bajram Begaj ka dekretuar Edi Ramën si kryeministër të qeverisë së re të dalë nga zgjedhjet parlamentare të 11 majit.
Në dekretin e firmosur nga kreu i shtetit, bie në sy një detaj interesant, pasi në pikën 2 shkruhet: “Kryeministri ushtron edhe përgjegjësinë për ngritjen dhe funksionimin e Ministrit Virtual të Inteligjencës Artificiale ‘Diella’”.
Pasi Bajram Begaj mandatoi Edi Ramën për kryeministër, ky i fundit do t’i paraqesë presidentit emrat e propozuar për formimin e kabientit të ri për t’i dekretuar emër për emër të 16 ministrat.
Pasi kreu i shtetit merr kërkesën, ka 6 ditë kohë për të bërë dekretimin. Më pas dekretet e firmosura nga presidenti Bajram Begaj, do të kalojnë në Kuvend seancën e radhës për miratim së bashku me programin elektoral qeverisës. Pas miratimit në parlament, të 16 ministrat e kabinetit Rama do të betohen përpara presidentit të Republikës.
Pak më herët, në Kuvend u mbajt seanca e parë e kësaj legjislature ku u miratua komisioni i përkohshëm për verifikimin e mandative, i cili u ngrit vetëm me votat e mazhorancës. Pas ngritjes së komisionit, drejtuesi i seancës Vasil Llajo bëri me dije se do të verifikohen mandatet dhe seanca e ardhshme do të zhvillohet në orën 17:00.
