Pas kthimit të tonelatave me domate nga Kroacia, Prokuroria e Beratit ka marrë masa drastike duke firmosur një urdhër-arresti. Gazetarja Anila Hoxha nga Top Channel raportoi se në kuadër të një operacioni nga Seksioni Kundër Krimit Ekonomik dhe Financiar, janë arrestuar tre persona, përfshirë administratorin e subjektit “Era-Fruit”, Mariglen Qorri.
Hetimet kanë zbuluar se autoritetet kroate kanë asgjësuar rreth 8 ton domate që kishin nivele të preparatit “Chlorfenapyr” mbi normat e lejuara, duke rezultuar 0.06 mg/kg në vend të 0.01 mg/kg. Qorri akuzohet për përdorimin e një fature blerje fiktive nga një fermer për të bërë praktikën doganore dhe për të shmangur përgjegjësitë sipas ligjit për produktet që ai ka prodhuar dhe tregtuar.
Sipas hetimeve, domatet e rrezikshme për shëndetin janë prodhuar dhe eksportuar nga vetë Qorri, ndërsa inspektorët e AKU Berat, Ronaldo Lika dhe Griselda Doksani, dyshohen se nuk kanë vepruar sipas detyrimeve të tyre pas njoftimit nga sistemi Rasff. Ata kryen një inspektim më 29 gusht 2025 në subjektin “Era Fruit”, por nuk gjetën sasinë e domateve të kontaminuara, duke mbushur praktikat si të rregullta dhe duke mos bërë bllokimin e produktit.
Lika dhe Doksani janë akuzuar për shpërdorim të detyrës, pasi dyshohet se kanë pranuar si të rregullt faturën e falsifikuar nga Qorri, e cila nuk ishte e firmosur nga fermeri/shitësi. Kjo ka çuar në një tjetërsim të faktet lidhur me origjinën e produktit.
Në përfundim, janë sekuestruar mostra të produkteve të tjera si domate, speca dhe kastraveca, të dyshuara për kontaminim. Të arrestuarit përballen me akuza të rënda, duke përfshirë “Importimi, prodhimi, shitja dhe ruajtja e ushqimeve të rrezikshme për shëndetin” si dhe “Mashtrimi me produktet ushqimore”. Materialet proceduriale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Berat për hetime të mëtejshme.
