Presidenti Joe Biden do të mirëpresë sot Donald Trump në Shtëpinë e Bardhë, pas fitores së këtij të fundit në zgjedhjet presidenciale amerikane të mbajtura më 5 nëntor. Takimi pritet të zhvillohet në Zyrën Ovale në orën 11:00 sipas kohës lokale në Uashington (ora 17:00 me orën tonë).
Përpara takimit me Presidentin Biden, Trump do të takohet me udhëheqësit republikanë të Kongresit, ndërsa Partia Republikane është pranë sigurimit të kontrollit mbi Senatin dhe mundësisë për të marrë shumicën në Dhomën e Përfaqësuesve.
Biden, tani 81 vjeç, ka shprehur urimet e tij për Trumpin, 78 vjeç, duke e ftuar në Shtëpinë e Bardhë për të diskutuar kalimin paqësor të pushtetit dhe për të përmbushur traditat e zakonshme për këtë proces. Demokratët kanë cilësuar më parë Trumpin si një kërcënim për demokracinë, por Biden është angazhuar për një transferim të qetë dhe të respektuar të pushtetit.
Kjo është një situatë krejtësisht ndryshe nga ajo e vitit 2020, kur pas zgjedhjeve presidenciale, Trump nuk e pranoi humbjen dhe nuk organizoi një takim të ngjashëm me Biden në Shtëpinë e Bardhë, as nuk mori pjesë në ceremoninë e inaugurimit të tij.
