Në Bolzano të Italisë, dy shqiptarë janë ndaluar nga policia, pasi dyshohen të jenë pjesë e një grupi kriminal të specializuar në vjedhje. Ndër ta, një 48-vjeçar me precedentë penalë dhe një shoqërues i tij 40-vjeçar, u kapën duke lëvizur me një automjet të vjedhur.
Karabinierët e Bolzanos vunë re një makinë “Ford Fiesta” që lëvizte në mënyrë të dyshimtë në Via Cesare Battisti. Gjatë kontrollit u konstatua se mjeti ishte vjedhur një ditë më parë në zonën e Appiano sulla Strada del Vino. Në makinë u gjetën edhe mjete të ndryshme për kryerjen e vjedhjeve, përfshirë një trapano, çekiç dhe mjete të tjera.
Nga verifikimet u zbulua se 48-vjeçari, i cili ishte ndaluar më parë për krime kundër pronës ishte dëbuar nga Italia për një periudhë 5-vjeçare, por kishte shkelur ndalimin dhe ishte rikthyer në vend. Nga ana tjetër bashkudhëtari i tij 40-vjeçar sapo kishte hyrë në Itali.
Komisioneri i Policisë së Bolzanos, Paolo Sartori, ka lëshuar një urdhër dëbimi për 48-vjeçarin, i cili do të largohet menjëherë nga territori pasi të përfundojnë procedurat penale. Edhe për 40-vjeçarin është vendosur një afat 7-ditor për t’u larguar nga vendi, përndryshe do të dëbohet me forcë.
