Sot ka nisur zyrtarisht viti i ri shkollor 2025-2026 në të gjithë vendin, me rreth 345 mijë nxënës që janë ulur në bankat e shkollave. Ministria e Arsimit njoftoi se mësimdhënien do ta zhvillojnë 31 mijë mësues, ndër të cilët 2,260 janë mësues ndihmës, me një rritje prej 150 krahasuar me vitin e kaluar. Një vëmendje e veçantë këtë vit i është kushtuar nxënësve me aftësi të kufizuara.
Pjesë e masave mbështetëse janë edhe transporti falas për 38 mijë nxënës dhe 12 mijë mësues, si dhe 3,500 bursa për familjet në nevojë. Librat shkollorë për ciklin fillor janë shpërndarë falas, megjithëse prindërit kanë shprehur shqetësim për kostot shtesë të materialeve të tjera shkollore.
Në disa qytete, për arsye të ndryshme, kemi reduktim të numrit të nxënësve.
Një ndër situatat më të ndërlikuara është në Korçë, ku numri i nxënësve ka rënë ndjeshëm – nga 21,080 vitin e kaluar në 17,354 këtë vit, duke sjellë mbylljen e dhjetëra klasave të para dhe bashkimin e disa shkollave. ky është një alarm serioz që kërkon ndërhyrje të menjëhershme për të frenuar rënien e numrit të nxënësve.
Rënia e regjistrimeve po ndikon edhe te mësuesit, shumë prej të cilëve rrezikojnë të mbeten pa ngarkesë mësimore dhe të transferohen si mësues ndihmës ose në programe jashtëshkollore.
Fillimi i këtij viti shkollor shënon jo vetëm një hap të ri për nxënësit, por edhe sfida të mëdha për sistemin arsimor, veçanërisht në zonat ku po bie ndjeshëm numri i fëmijëve.
