Gjykata e Lartë e Victorias dënoi me burgim të përjetshëm Erin Patterson, 50 vjeçe, e cila helmoi me kërpudha vdekjeprurëse tre të afërmit e saj gjatë një dreke në korrik 2023. Viktimat ishin Don dhe Gail Patterson, si dhe Heather Wilkinson, ndërsa mbijetoi vetëm pastori Ian Wilkinson.
Pastori, i vetmi që mbijetoi, u trajtua për javë të tëra në spital. Gjykata vendosi që dënimi me burgim të përjetshëm për tre vrasjet të kryhet njëkohësisht me një dënim shtesë prej 25 vjetësh për tentativë vrasjeje ndaj tij.
Gjykatësi e cilësoi krimin si një “tradhti të jashtëzakonshme”, duke vendosur që Patterson të mund të kërkojë lirim me kusht vetëm pas 33 vitesh. Pas seancës, pastori Wilkinson falenderoi autoritetet dhe bëri thirrje për mirësi dhe kujdes mes njerëzve.
Ky rast, i njohur si “darka e kërpudhave”, ka tronditur Australinë dhe është komentuar gjerësisht si një nga krimet më të rënda familjare në vend.
