Anglia ka “Lamine Yamal”-in e vet dhe emri i tij është Max Dauman. Djali i Arsenalit, i lindur në vitin 2009 në Chelmsford, tashmë ka tërhequr vëmendjen e futbollit evropian.
Me 15 vjeç e 247 ditë, ai debutoi për “Topçinjtë” në Premier League, në një fitore 5-0 ndaj Leeds, duke bërë histori si lojtari i dytë më i ri që ka luajtur ndonjëherë në këtë garë – pas vetëm shokut të skuadrës Ethan Nouanere (15 vjeç e 181 ditë). Sikur të mos mjaftonte kjo, ai fitoi edhe një penallti, duke shkaktuar emocione midis tifozëve të ekipit.
Fenomeni Dauman ka bërë që edhe një trajner aq i matur sa Thomas Tuchel të flasë me superlativa: “Aftësia e tij është diçka që nuk e kam parë kurrë më parë. Ai ka një talent të jashtëzakonshëm. Nëse vazhdon në këtë nivel, do të duhet ta konsideroj seriozisht për ekipin kombëtar në Kupën e Botës”, theksoi trajneri i Anglisë.
Edhe pse Kupa e Botës 2026 duket ende e largët, Dauman po bën hapa të mëdhenj. Ai është promovuar tashmë në ekipin U19 të Anglisë, duke dëshmuar se e ardhmja e futbollit në Ishull mund të ketë një protagonist të ri – dhe në një moshë kur të tjerët janë ende në departamentet e infrastrukturës.
Kujtojmë që më 16 nëntor “3 luanët” do të jenë në Tiranë përballë Shqipërisë për mbylljen e llogarive të grupit kualifikues për në Botërorin e 2026-s. Me gjasë deri në ndeshjen e fundit Anglia do t’i ketë mbyllur çështjet e kualifikimit e si rrjedhojë do të jetë një rast i mire për lojtarin por edhe për trajnerin Tuchel që të provojë elementët e rinj.
