Një person me nënshtetësi rumune i identifikuar me inicialet A. D., ka pretenduar së fundmi se një kallëzim i bërë nga ai në Policinë e Durrësit për disa persona që kishin ushtruar dhunë fizike mbi të, nuk është marrë seriozisht nga autoritetet.
Së fundmi, Policia e Durrësit ka reaguar zyrtarisht duke sqaruar se turisti, i cili po kalon pushimet në qytetin bregdetar, i është drejtuar stacionit të policisë më datë 14 gusht në mesditë duke thënë se është dhunuar fizikisht nga 5 persona, për motive të dobëta, në lagjen nr.13.
Policia sqaron se pas marrjes së kallëzimit, kanë nisur hetimet për ngjarjen në fjalë dhe si rezultat në komisariat janë shoqëruar dy të mitur të moshës 17 vjeç, të dyshuar si dhunuesit e turistit.
Për 2 të miturit, policia ka nisur procedim penal në gjendje të lirë ndërsa hetimet po vijojnë për vënien përpara drejtësisë të të gjithë personave të implikuar në këtë ngjarje.
Reagimi i Policisë së Durrësit:
Në lidhje me një lajm të publikuar në një portal mediatik, në lidhje me dhunimin e një shtetasi të huaj dhe me pretendimin se Policia nuk kishte bërë asnjë veprim konkret mbi rastin, sqarojmë:
Rreth orës 22:00 të datës 14.08.2025, është paraqitur te Stacioni i Policisë Plazh, shtetasi austriak (me kombësi rumune) A. D., i cili ka kallëzuar se rreth orës 15:30 të datës 14.08.2025, ishte dhunuar për motive të dobëta, nga 5 shtetas, në lagjen nr. 13.
Menjëherë pas kallëzimit, janë kryer veprimet e nevojshme hetimore, si rezultat i të cilave janë identifikuar dhe shoqëruar në ambientet e Policisë, dy 17-vjeçarë që dyshohet se kanë dhunuar shtetasin A. D..
Në përfundim të veprimeve procedurale, pas konsultimit me prokurorin, për dy të miturit nisi procedimi në gjendje të lirë për veprën penale “Dëmtime të tjera me dashje”.
Ndërkaq, vijojnë hetime për të identifikuar dhe nxjerrë përpara përgjegjësisë penale, të gjithë shtetasit e implikuar në këtë rast.
Drejtoria Vendore e Policisë Durrës garanton qytetarët dhe median, se është maksimalisht e angazhuar, për të ndjekur shpejt, me paanshmëri dhe konform ligjit, çdo indicie për paligjshmëri që ata kanë.
