Kanali i njohur BBC analizoi arsyet se pse Presidenti Donald Trump ka vendosur të anulojë mbrojtjen e ‘Secret Service’ për ish-Zëvendëspresidenten Kamala Harris, vetëm shtatë muaj pas përfundimit të mandatit të saj. Sipas BBC ky vendim ka shkaktuar një polemikë të madhe në politikën amerikane, sidomos tani që Harris planifikon një turne kombëtar për promovimin e librit të saj “107 Days”, i cili rrëfen periudhën e kandidaturës së saj presidenciale në vitin 2024.
Ligji federal i vitit 2008 parashikon që ish-zëvendës-presidentët të gëzojnë mbrojtje për gjashtë muaj pas përfundimit të detyrës, me mundësi zgjatjeje në raste të veçanta, kur rreziku vlerësohet të jetë më i lartë. Sipas burimeve, Joe Biden kishte firmosur një urdhër për zgjatjen e mbrojtjes për Harris, vendim që Trump tani e ka anuluar.
Edhe pse vlerësimet e fundit nuk kanë identifikuar rreziqe të menjëhershme për Harris, stafi i saj ka theksuar se pozita e saj si gruaja e parë dhe e para me ngjyrë në këtë rol e bën atë një figurë të ekspozuar ndaj kërcënimeve. Në vitin 2024, disa individë u arrestuan për kërcënime direkte ndaj saj, duke përfshirë plane atentati.
Guvernatori i Kalifornisë, Gavin Newsom, dhe kryetarja e bashkisë së Los Angeles, Karen Bass, kanë reaguar ashpër, duke e cilësuar vendimin si politikisht të motivuar dhe hakmarrës. Newsom ka thënë se “siguria e zyrtarëve publikë nuk duhet të jetë lojë politike”.
Analisti Ronald Kessler ka komentuar se vendimi i Trump për të hequr mbrojtjen ka një anë praktike, duke theksuar se Shërbimi Sekret është nën presion logjistik dhe do të ishte e vështirë të ofronte siguri për Harris gjatë turneut të saj. Kessler ka vënë në dukje se Trump ka hequr mbrojtjen për disa figura të tjera, duke e parë këtë si një pastrim politik më të gjerë.
Ndryshe nga ish-zëvendës-presidentët, ish-presidentët amerikanë gëzojnë mbrojtje të përhershme nga ‘Secret Service’. Momentalisht, Kamala Harris do të duhet të sigurojë mbrojtje private, një kostot e së cilës mund të arrijë miliona dollarë në vit.
