Udhëheqësi koreano-verior Kim Jong UN do të marrë pjesë në një paradë ushtarake në Pekin, në krah të presidentit rus Vladimir Putin.
Njoftimin për atë që do të jetë takimi i parë shumëpalësh i diktatorit të Koresë, e dha Kina. Ngjarja do të shënojë një fitore diplomatike për Xi Xhinpin, i cili po punon për një rend të ri global të udhëhequr nga Kina.
Ajo do t’i lejojë presidentit kinez të tregojë influencën e tij, si tek Putin ashtu edhe Kim, në një kohë kur Uashingtoni po përpiqet të bëjë ujdi me Moskën për t’i dhënë fund luftës në Ukrainë.
Presidenti amerikan Donald Trump nuk do të marrë pjesë por tha më herët gjatë javës se donte të takohet me udhëheqësin e Phenianit, i cili ka armiqësuar perëndimin për arsenalin bërthamor në rritje dhe mbështetjen për Rusinë.
Parada e ditës së fitores në Kinë, do të shënojë 80 vjetorin e dorëzimit të Japonisë në luftën e dytë botërore dhe fundin e konfliktit. Putin dhe Kim Jong-un do të jenë mes 26 krerëve të shteteve të cilët pritet të marrin pjesë në paradë.
Kjo është hera e parë që një lider koreano-verior merr pjesë në një ngjarje të tillë në Kinë që prej 1959. Pekini me gjasë pritet të ekspozojë armatimet e reja, përfshirë qindra avionë, tanke dhe sisteme antidronë. Do të jetë hera e parë që struktura e re ushtarake kineze do të shfaqet e plotë në një paradë.
Eventi i realizuar deri në detaje, do të përfshijë dhjetëra mijëra ushtarë që do të parakalojnë në formacione përmes sheshit historik të Tiananmen. Ajo do të mbikëqyret nga Xi Xhinpin, ndërsa do të ndiqet me vëmendje nga analistët dhe fuqitë perëndimore.
