Një 47-vjeçar, i cili akuzohet nga GJKKO-ja se organizoi vrasjen e 2 shtetasve në Vlorë (krim i parandaluar) është ekstraduar nga Spanja.
Bëhet fjalë për shtetasin Leonard Luzi alias Leonard Sejno,i cili kishte organizuar dhe porositur shtetasin Amarildo Nikolli per të vrase shtetasit Ervis Matodashaj dhe Inez Hajrulla. Vrasja nuk u krye pasi ekzekutori u arrestua në flagrance nga policia para se të kryente vrasjen.
“Si rezultat i bashkëpunimit mes autoriteteve të Shqipërisë dhe Spanjës, në zbatim të marrëveshjes së ekstradimit, u ekstradua nga Spanja, shtetasi L. L. alias L. S., 47 vjeç, i lindur në Vlorë.
Gjykata e Posaçme e Shkallës së Parë për Korrupsionin dhe Krimin e Organizuar i ka caktuar këtij shtetasi, masën e sigurisë “Arrest në burg”, për veprat penale “Sigurimi i kushteve dhe i mjeteve materiale për të kryer vrasje” dhe “Mbajtja pa leje dhe prodhimi i armëve, armëve shpërthyese dhe i municionit”, të kryera në bashkëpunim në formën e grupit të strukturuar kriminal.
47-vjeçari akuzohet se në bashkëpunim me pjesëtarë të tjerë të grupit kriminal, kishte organizuar vrasjen e shtetasve Ervis Matodashaj dhe Inez Hajrulla.
Ky krim u parandalua nga Policia, pasi shtetasi Amarildo Nikolli, u arrestua para se të kryente vrasjet”, njofton policia.
Nikollit në momentin e arrestimit, iu sekuestrua pistoleta me fishek në fole, e gatshme për qitje.
