Kur ndodhemi vetëm disa javë para nisjes së sesionit të ri parlamentar në shtator, kreu i Partisë Republikane, Fatmir Mediu ka folur rreth qëndrimit që opozita do të mbajë në kuvend.
Mediu u shpreh se duhet bërë një analizë për zgjedhjet e majit, pas raportit të ODIHR, teksa zërave për largimin e Berishës iu përgjigj se momentalisht nuk ka asnjë figurë që mund të përbashkojë PD dhe opozitën në tërësi përveç tij.
Sipas Mediut, largimi i Berishës nga PD do të thotë vetëvrasje, por opozitarët nuk do ta bëjnë këtë gjë, pasi Mediu shton se “do ringjallemi si Krishti”.
“Për të bërë një analizë të zgjedhjeve, duhet një raport i ODIHR. PD duhet të bëjë analizën se kush ishin problemet.
Për rregullat brenda PD nuk e gjykoj unë. Nëse kërkohet të largohet Berisha, nuk mendoj se ka një autoritet që mund ti bashkojë në një front të vetëm. Nuk mund të kryejmë vetëvrasje sepse do ringjallemi si Krishti.
Sa i nxehtë do të jetë shtatori, unë mendoj se opozita duhet të jetë e mëncur për të krijuar një bindje të qytetarët dhe faktori opozitar. Kemi diskutuar një plan veprimi…
Ne jemi në një koalicion me PD, po të futeshin dhe partitë e tjera rezultati do të ishte dhe më i mirë”, tha Mediu.
