Saga e konstituimit të Kuvendit të Kosovës u finalizua me zgjedhjen e Dimal Bashës si kryeparlamentar. Deputeti deklaroi nga foltorja e Kuvendit se partitë politike janë të ndryshme, por Kosovën ‘e kanë bashkë’.
Më tej, Basha solli në fokus shtetin fqinj Serbi për të cilën tha se duhet të qëndrojnë të bashkuar ndaj tendencave të saja territoriale. Basha tha se në Kuvend pret debate të hapura dhe përballje politike për më të mirën e Kosovës.
“Qeveria me vullnetin e Kurtit dhe punën e policisë sonë kanë arritur të thyejnë grupet kriminale. Shteti ynë ka monopolin e dhunës në territorin e Kosovës, pa përfshirë zhvillimin e mirëqenies dhe ekonomisë. Të qëndrojmë të bashkuar përballë Serbisë që shfaq tendenca territoriale.
Mbrojtja është përgjegjësi e përbashkët. Nga ky Kuvend bëj thirrje për një Serbi që e njeh Kosovën si shtet të pavarur, fqinjësi të mirë dhe gjenerata me respekt dhe tolerancë. Ne jemi për ndërtim të urave të bashkëpunimit. Demokracia është larmishmëria e ideve ndryshe. Në këtë Kuvend pres debat të hapur, përballje politike për një Kosovë më të drejtë dhe të zhvilluar. Partitë i kemi ndryshe, por Kosovën e kemi bashkë.”
