Policia Kufitare e Vlorës u shkoi në ndihmë ditën disa pushuesve që u rrezikuan në det gjatë lundrimit në Sarandë dhe në Palasë.
Shërbimet e Policisë Kufitare ndërhynë dhe bënë të mundur ndihmën dhe shoqërimin e turistëve dhe mjeteve lundruese drejt bregut.
“Pas marrjes së njoftimit se, rreth një milje larg Gjirit të Sarandës, kapiteni i një jahti me flamur maltez kërkonte ndihmë pasi mjeti i tij lundrues kishte pësuar defekt dhe kishte marrë ujë, shërbimet e Policisë Kufitare ndërhynë menjëherë dhe bënë të mundur shoqërimin e kapitenit në mënyrë të sigurt në breg dhe rimorkimin e jahtit në Portin e Limionit.
Pas marrjes së njoftimit se, në zonën e Shën Andreut, disa turistë që ndodheshin në bordin e një mjeti lundrues po rrezikoheshin për shkak të kushteve të vështira të detit, shërbimet e Policisë Kufitare ndërhynë menjëherë dhe bënë të mundur shoqërimin e turistëve në mënyrë të sigurt në breg dhe ankorimin e mjetit të tyre lundrues në molin e Palasës.”-njoftoi sot policia.
