Një foto e rremë, që pretendon të tregojë udhëheqësit evropianë të ulur në një korridor të Shtëpisë së Bardhë, është shpërndarë miliona herë.
Llogaria e mediave sociale Nexta e shpërndau imazhin me një shënim që thoshte: “Udhëheqësit evropianë po presin në korridor për t’u takuar me Trump-in“, por më vonë e korrigjoi duke theksuar se “fotoja është e rreme dhe është krijuar nga Inteligjenca Artificiale.“
Donald Trump Jr. gjithashtu e shpërndau këtë imazh për ndjekësit e tij në Instagram, duke arritur 9.7 milionë shikime. Imazhi tregon shtatë persona të ulur në një korridor, ku përfshihen tri gra, ndërsa në grupin e udhëheqësve që ishin ulur rreth tryezës me Trump-in, kishte vetëm dy gra. Po ashtu, veshjet e personazheve në foto nuk përputhen me ato që kishin veshur kryeministrja italiane, Giorgia Meloni, dhe presidentja e Komisionit Europian, Ursula von der Leyen, gjatë takimit të tyre me presidentin amerikan.
Megjithatë, imazhi vazhdon të shpërndahet masivisht, me komente që shpesh e shoqërojnë me shprehje si: “Të poshtëruar dhe të fyer në korridorin e Shtëpisë së Bardhë, duke pritur të zotin.”
