Emigrimi i shqiptarëve drejt Britanisë së Madhe, i cili ka qenë një fenomen i dukshëm që prej vitit 1998, ka pësuar një rënie të theksuar vitet e fundit.
Sipas të dhënave të fundit nga Ministria e Punëve të Brendshme e Britanisë, kërkesat për azil nga shqiptarët kanë rënë ndjeshëm. Në vitin 2024, vetëm 3,698 shqiptarë aplikuan për azil, një rënie drastike krahasuar me vitin 2022, kur numri i aplikimeve ishte 17,340.
Rënia e numrit të aplikimeve për azil lidhet ngushtë me faktin që Shqipëria është konsideruar një vend i sigurt nga qeveria britanike, çka ka bërë që shqiptarët të mos kenë më mundësinë për t’u akomoduar në Britani përmes këtij procesi. Vetëm 3% e kërkesave të azil-kërkuesve shqiptarë janë pranuar, ndërkohë që shumë kërkesa janë refuzuar.
Po ashtu, numri i vizave turistike për shqiptarët ka pësuar një rritje, me 68% të aplikimeve të miratuara gjatë vitit 2024, megjithatë duket se shqiptarët janë më pak të interesuar për emigrim afatgjatë. Ndërkohë, shqiptarët janë ende të pranishëm në burgjet e Britanisë, me 1,193 shtetas shqiptarë që vuajnë dënimet në burgjet e Anglisë dhe Uellsit, një numër i lartë krahasuar me kombet e tjera.
Shifrat dhe këto zhvillime tregojnë se, ndonëse ka pasur një periudhë të gjatë migrimi të shqiptarëve në Britani, interesimi për emigrimin ka pësuar një rënie të dukshme, për shkak të ndryshimeve në politikat e emigracionit dhe rritjes së numrit të refuzimeve. IliriaNews shkruan se tashmë shqiptarët po zgjedhin vende të tjera për të emigruar.
