Një avion i kompanisë Condor, që kishte nisur fluturimin nga Korfuz drejt Dyseldorfit, pësoi një defekt serioz mbrëmjen e së shtunës, kur njëri prej motorëve të tij mori flakë pak minuta pas ngritjes.
Video të publikuara në rrjete sociale tregojnë shpërthime dhe tym nga motori i djathtë të avionit Boeing 757-300, gjë që shkaktoi panik tek pasagjerët dhe banorët e zonës.
Pilotët vepruan sipas protokolleve të sigurisë: fikën motorin, aktivizuan sistemin e shuarjes së zjarrit dhe e devijuan avionin drejt aeroportit të Brindizit në Itali, ku u ul me sukses. Në bord ndodheshin 250 pasagjerë, të gjithë të padëmtuar.
Ekspertët theksojnë se, ndonëse zjarri në motor duket shqetësues, avionët modernë janë projektuar të fluturojnë edhe vetëm me një motor, dhe procedurat e sigurisë e bëjnë rrezikun real për jetën e udhëtarëve shumë të ulët.
