I njohur për politikën e tij izoluese “America First”, presidenti amerikan Donald Trump po përpiqet të fitojë një nga çmimet më prestigjioze në botë, Nobelin për Paqe. Sipas La Stampa, sfida e tij kryesore është takimi me presidentin rus Vladimir Putin në Alaska, ku Trump synon të ndërmjetësojë një marrëveshje paqeje për Ukrainën, konflikt që ka shkaktuar rreth 1.5 milionë viktima.
Pavarësisht skepticizmit të analistëve për arritjen e një progresi të madh, një marrëveshje e drejtë do të ishte një sukses diplomatik i pazakontë, që nuk u arrit nga paraardhësit e tij, Obama dhe Biden.
Në muajt e fundit, Trump ka theksuar rolin e tij në ndërmjetësimin e disa marrëveshjeve të paqes në rajone të tensionuara, si Izrael-Iran, Indi-Pakistan, Armeni-Azerbajxhan dhe Ruandë-Kongo. “Kam ndalur gjashtë luftëra,” deklaroi ai së fundmi në Skoci, duke theksuar angazhimin e tij për paqen globale.
Përpjekjet e tij kanë marrë mbështetje publike nga liderë të ndryshëm botërorë, përfshirë Benjamin Netanyahun dhe përfaqësues të Armenisë, Azerbajxhanit e Pakistanit. Edhe Hillary Clinton, megjithëse në mënyrë ironike, ka thënë se do ta mbështeste kandidaturën e Trump nëse ai arrin paqen në Ukrainë pa kompromise territoriale ndaj Rusisë.
Megjithatë, vendimi i përket komitetit norvegjez të Nobelit, që ndjek kriteret e Alfred Nobelit për vëllazërimin mes kombeve. Nëse takimi i sotëm sjell një armëpushim, kandidatura e Trump mund të bëhet e vështirë për t’u injoruar.
