Vladimir Dulellari, Edison Çuko, Drivan Guri, Emiljano Guri, Fatjon Feka dhe Xhulio Hallko janë gjashtë bijtë e Skraparit që u rrëzuan me makinë në humnerë, në Kanionet e Osumit, dhe çdo vit kujtohen me lule e lot nga banorët e fshatit.
Pasditen e 15 Gushtit 2011, makina me të cilën ata udhëtonin drejt Çorovodës për të pirë kafen e pasdites u rrëzua në thellësitë e kanioneve në rrugën pranë fshatit Grepckë. I gjithë qyteti i përjetoi me ankth e dhimbje operacionet e kërkim shpëtimit.
Fatkeqësisht, gjashtë djemtë e zonës u nxorën të pajetë. Aksident tragjik i ndodhur 14 vite më parë përgjaku përgjithmonë Skraparin dhe hapi plagë që nuk do të mbyllen kurrë.
Vladimiri, Edisoni, Drivani, Emiljano, Fatjoni dhe Xhulio mbetën të paharruar. Ata u larguan shumë shpejt drejt parajsës, por në vendin ku ata u rrëzuan dhe mbi lapidarin që është ngritur buzë rrugës, çdo natë yjet ndriçojnë me emrat e tyre.
“Ju jeni plagë që nuk mbyllet, por edhe dritë që nuk shuhet kurrë. Shpirtrat tuaj qëndrojnë pranë nesh, në çdo hap, në çdo frymëmarrje, në çdo kujtim. Pushoni në paqe, bij të dashur të këtij vendi”, thuhet në reagimin e fshatit, i cili i kujton bijtë e vetë çdo përvjetor.
Siç u konfirmua më vonë, viktimat ishin të gjithë të rinj, të moshës nga 19 deri në 26 vjeç, banorë të qytetit dhe të rrethinave të Çorovodës. Ngjarja e rëndë u shënua rreth orës 19:45 të mbrëmjes së 15 Gushtit 2011, rreth 3 km larg qytetit. Ata po udhëtonin me një fuoristradë me targa angleze.
Nga vendi ku ka dalë makina nga rruga deri në Osum është një thellësi prej rreth 150 metrash, çka e ka bërë të pamundur shpëtimin e jetëve të të rinjve. Ai ishte aksidenti më i rëndë i ndodhur atë vit në Shqipëri.
Me të mësuar ngjarjen e rëndë, forca të shumta të Policisë së Skraparit, drejtuar nga shefi i tyre, Fatmir Lleshi kanë shkuar me urgjencë. Ata kanë pikasur makinën e ndalur në një shkëmb dhe asnjë shenjë të viktimave. Me urgjencë është kërkuar ndihma e Forcave Speciale të Fierit.
Megjithëse ata kanë tentuar të hyjnë në ujërat e lumit Osum, ka qenë e pamundur të realizohet nxjerrja e viktimave. Vetëm në orët e vona të mbrëmjes kanë mbërritur Forcat RENEA nga Tirana, të cilat nxorën trupat e të rinjve.
Vladimir Durellari, 26 vjeç
Fatjon Feka, 23 vjeç
Emiljano Guri, 21 vjeç
Xhulio Allko, 19 vjeç
Edison Çuko, 26 vjeç
Drilon Guri, 24 vjeç
