Një ngjarje e pazakontë është regjistruar pasditen e kësaj të enjte në lagjen numër 3 të Pogradecit. Tre automjete janë sulmuar nga një shtetas, i cili iu ka çarë gomat pasi këto të fundit i kishin zënë vendin e parkimit.
Mësohet se shtetasi i cili tashmë është shoqëruar në komisariat, teksa është kthyer nga puna ka parë se vendet e parkimit para pallatit të tij ishin të zëna nga mjete të pa pajisura me pullë rezidenti.
Burime bëjnë me dije se si fillim ai ka kërkuar ndërhyrjen e policisë së shtetit, por këta të fundit e kanë pasur të pamundur të gjejnë drejtuesit e mjeteve dhe janë larguar.
Pas largimit të Policisë, ankuesi ka marrë thikën në banesën e tij dhe ka çarë gomat e tre mjeteve.
Sapo kanë konstatuar gomat e çara, drejtuesit e mjeteve kanë denoncuar në polici dhe kjo e fundit ka shoqëruar autorin për sqarime të mëtejshme.
